Esti añu pudo ser el primeru nel que celebráremos una Selmana de les Lletres Asturianes nun contestu d’oficialidá pa les lligües d’Asturies. Diba ser una bona forma de festexar los 50 años de la fundación de la organización Conceyu Bable y facer homenaxe a los miembros d’esta organización que camudó dafechu la forma d’entender Asturies y sobre manera, el cómo nos rellacionamos los propios asturianos y asturianes cola nuesa identidá y el nuesu idioma.
Nun pudo ser desta, pero nun ha ser motivu pal desánimu, que namás lleva a la desmovilización. Siguimos nel camín y nel llabor, con cada vegada mayores consensos sociales y políticos. Si daqué nos deprendió Conceyu Bable ye que lo que paez imposible, si se trabaya, ye algamable.
Mediu sieglu ye bien poco na hestoria milenaria d’Asturies y de la llingua asturiana, pero fueron estes cinco décades especialmente granibles pal llabor pol idioma. Suaños como’l d’una Academia de la Llingua Asturiana, que yá tuvo Xovellanos nel sieglu XVIII, y que tuvo dellos intentos, fíxose posible de forma estable dende va yá cuasi 45 años. L’asturianu entró nes escueles, como propunxera’l Padre Galo yá nos años 20. Conceyu Bable recuperó la bandera, escaecida pola mayoría de los asturianos y asturianes, punxo en valor un himnu desprestixáu, como lo taben la gaita, la gastronomía o la cultura sidrera, güei a les puertes de ser Patrimoniu Inmaterial de la Humanidá. Y anque güei paez incontestable, l’autonomía reclámala n’Asturies, per primer vegada dempués de los cuarenta años de dictadura y cuasi en solitariu, esta mesma organización.
Per delantre queden entá munchos pasos a dar pa que l’Asturies que suañó Conceyu Bable seya realidá. Cuntar con una mayor autonomía o completar la normalización y oficializar les llingües d’Asturies son delles de les xeres que nos toca siguir trabayando a les xeneraciones que siguimos el llabor y a les que vengan, otros 50 años o los que faiga falta.
Esta ye una carrera de relevos pela hestoria lluchando pola conservación de la identidá d’Asturies. Una identidá que nos define de forma dinámica y proyectaos p’hacia’l futuru y nun intercambiu col restu del mundu que nos arriquez a nós y col qu’arriquecemos a los demás.
Bona idea sedría, coincidiendo con esti añu d’alcordanza y homenaxe a Conceyu Bable, otorga-yos una Medaya d’Asturies a les persones que formaron parte d’aquel llabor que camudó Asturies dafechu pa siguir siendo como siempres. Sedría una reconocencia bien xusta y merecida.